Aflarinn heyrir sögunni til

Aflarinn ehf. hefur sagt upp samningi sínum við Fiskstofu um aðgang að vefþjónustu fyrir skil aflaupplýsinga. Fiskistofa vekur athygli á þessu í tilkynningu á vef sínum.

Þar segir að samningur Aflarans við Fiskistofu fellur úr gildi 1. janúar 2024 og ekki verður hægt að nota þeirra þjónustu við skil aflaupplýsinga frá og með þeim degi. Útgerðaraðilar sem eru að nota þjónustu Aflarans við skil aflaupplýsinga verða því að leita til nýs þjónustuaðila.

„Fiskistofa áréttar fyrir skipstjórnarmönnum að í millitíðinni þurfi að gæta að því að skrá aflaupplýsingar í réttri röð í viðmóti kerfis Aflarinn ehf., svo upplýsingarnar berist með réttum hætti til vefþjónustu Fiskistofu. Ábyrgð á réttum skilum aflaupplýsinga í samræmi við lög og stjórnvaldsfyrirmæli hvílir á skipstjórnarmanni fiskiskips,“ segir í tilkynnignunni.

Bendir stofnunin á að upplýsingar um afladagbók er að finna á heimasíðu Fiskistofu, ásamt upplýsingum um þá þjónustuaðila sem hlotið hafa samþykki að uppfylltum kröfum stofnunarinnar um skil aflaupplýsinga í vefþjónustu.

Óviðráðanlegar aðstæður

Aflarinn hóf göngu sína í byrjun árs 2022 og var markmiðið að bjóða einfalt viðmót til að skila inn afladagbókum til Fiskistofu. Aflarinn hefur verið heimasíða, sem þýðir að hægt hefur verið að nota Aflarann bæði á fartölvum, snjallsímum eða spjaldtölvum. Fyrstu vertíðina var afnot af Aflaranum gjaldfrjáls en var síðar krafist fimm úsund krónur í mánuði sem áskriftargjald.

Í október mátti svo sjá tilkynningu á Facebook-síðu Aflarans þar sem sagði: „Vegna óviðráðanlegra aðstæðna kemur aflarinn til með að loka núna um áramótin 2024. Við þökkum samstarfið undanfarin ár.“

• Blogga um frétt