130 starfsmenn teknir af launaskrá Vísis
Setja bókamerki
Í dag fengu 130 af starfsfólki Vísis ehf. í Grindavík bréf þar sem þeim er tilkynnt að þau falli af launaskrá og þeim bent á að sækja beint um greiðslur til Vinnumálastofnunar vegna náttúruhamfaranna í Grindavík. Ekki er þó um rof á ráðningasambandi að ræða. Eftir eru 60 sem haldast starfandi við verkefni sem í gangi eru, meðal annars saltfiskvinnslu í Helguvík.
Frá þessu er greint á vef útgerðarinnar.
Þar er bent á að verklagsreglur almannavarna hamla því að starfsemi sé haldið úti í Grindavík að öllu leyti eða hluta. Auk þess sem afstaða Náttúruhamfaratrygginga til þess hvað telst beint tjón af völdum náttúruhamfaranna er ekki ljós, sem sagt er koma í veg fyrir fleiri tilraunir með rekstur í Grindavík.
„Við höfum átt í ítarlegum samskiptum við yfirvöld vegna þessa, án árangurs,“ segir í bréfinu sem er undirritað af Pétri H. Pálssyni, framkvæmdastjóra Vísis.
Ástandið vari fram á sumar
Vísir hefur tekist að hefja starfsemi með saltfisk á tveimur nýjum stöðum en starfsmenn þar eru færri en annars væri og verkefnin hafa breyst, jafnframt hafa almannavarnir gefið út að núverandi ástand geti staðið fram á sumar 2024 og telja stjórnendur félagsins að ekki hafi verið annar kostur í stöðunni en að stöðva greiðslu launa til starfsfólks í landi.
„Ráðningasambandi starfsfólksins við Vísi ehf. rofnar ekki við þennan gjörning og þegar starfsemi hefst aftur í Grindavík getur starfsfólk hafið störf að óbreyttu. Hvenær af því verður vitum við þó ekki á þessari stundu. Við munum eins og aðrir fylgjast grannt með framvindunni á hættumati og jarðhræringum. Unnið verður að því að tryggja rekstrargrundvöll félagsins í gegnum þessa óvissutíma og við munum áfram þrýsta á yfirvöld að gera okkur kleift að halda áfram starfsemi í Grindavík að gættu fyllsta öryggis,“ segir að lokum í bréfinu.
Hinn almenni Íslendingur tengi ekki við flokkinn í dag
Tveir stungnir í gistiskýlinu á Granda
Bæjarstjórinn ósammála ritara Sjálfstæðisflokksins
Hyggst leiða ríkisstjórnina til enda
Fluttur á Hólmheiði af öryggisástæðum
Gerbreytt staða hælisleitarmála
Ólína: „Þeir eru oft aulalegir í málflutningi“