Láta smíða nýjan Júlíus Geirmundsson ÍS

Hraðfrystihúsið Gunnvör hf. hefur undirritað samning um smíði á nýju frystiskipi í stað Júlíusar Geirmundssonar ÍS 270. Áætlaður afhendingartími skipsins er síðari hluta árs 2026.

Frá þessu greinir vestfirski fréttamiðillinn Bæjarins besta (BB).

Skipasmíðastöðin Astilleros Ria del Vigo í Vigo á Spáni mun smíða skipið og er það hannað af verkfræðistofunni Skipasýn ehf. í samvinnu við Gunnvör hf. Skipið verður 67,1 metri að lengd og 16 metra breitt.

„Nýja skipið verður hagkvæmt í rekstri og búið öllum nýjasta tækjabúnaði sem völ er á. Orkunýtni verður mjög góð og byggir á stórri hæggengri skrúfu svipað og er á öðrum togara fyrirtækisins Páli Pálssyni ÍS 102 og reynst hefur afar vel undanfarin sex ár,“ segir í frétt BB.

• Blogga um frétt