Ekið fram af bryggjum 25 sinnum á 20 árum

Alls hafa orðið 25 slys sem skráð eru undir flokkinn „ekið fram af bryggju“ á tímabilinu 1. október 2003 til 30. september 2023, upplýsir Samgöngustofa. Þar af eru fimm banaslys, eitt slys með alvarlegum meiðslum, þrjú slys með litlum meiðslum og 16 óhöpp án meiðsla.

Meirihluti banaslysa á síðustu átta árum

Meirihluti banaslysa, þar sem ökutæki hefur farið fram af bryggju á síðustu 20 árum, hefur átt sér stað á síðustu átta árum.

Í apríl í fyrra lést maður er bíll hans fór fram af Nausthamarsbryggju í Vestmannaeyjum. Í nóvember 2017 lést þriggja manna fjölskylda eftir að bifreið þeirra fór fram af bryggjunni á Árskógssandi í Eyjafirði, en árið þar á undan lést karlmaður eftir að bíll hans fór fram af bryggju í Stykkishólmi.

Þá hafa orðið fleiri alvarleg atvik þar sem fólk hefur komist lífs af og má í því samhengi nefna alvarlegt atvik í Hafnarfirði í janúar 2020 þegar bifreið með þrjá unga drengi lenti í höfn bæjarins.

Frétt af mbl.is

Ökumaðurinn missti sennilega meðvitund

Allar bryggjur uppfylli kröfur

Samgöngustofa fullyrðir í svari við fyrirspurn Morgunblaðsins að allar bryggjur landsins hafi verið teknar út með tilliti til öryggisþátta og þær uppfylli gildandi kröfur.

Þó segir stofnunin ekki liggja fyrir heildarlisti yfir bryggjur landsins og hvenær þær voru síðast teknar út.

Þá segir í svarinu að eldri bryggjur hafi verið uppfærðar til að uppfylla kröfur um öryggi og slysavarnir, en stofnunin viðurkennir þó að dæmi séu „um eldri bryggjur sem enn hafa ekki verið uppfærðar að fullu leyti til samræmis við gildandi reglugerð“.

Umfjöllunina má lesa í heild sinni í Morgunblaðinu í dag, laugardag.