„Áhrif loðnubrests eru enn mikil og víðtæk“

„Ljóst er að loðnubrestur mun setja sitt mark á útflutningstekjur þjóðarbúsins af sjávarafurðum í ár. Vissulega eru áhrifin ekki nærri eins sýnileg á útflutningstekjur þjóðarbúsins í heild og á árum áður vegna aukinna umsvifa annarra útflutningsgreina. Engu að síður breytir það því ekki að áhrif loðnubrests eru enn mikil og víðtæk, þá sérstaklega á tekjur þeirra samfélaga þar sem útgerð loðnuskipa og vinnsla á landi er hvað mest, eins og á Austurlandi og í Vestmannaeyjum,“ segir í nýjustu greiningu Radarsins.

Þar er fjallað um útflutningsverðmæti sjávarafurða í mars síðastliðnum, en þær eru töluvert minni en í sama mánuði á síðasta ári. Einnig er mikill munur milli fyrsta ársfjórðungs þessa árs og síðasta ár og vegur loðnan þar þungt.

Frétt af mbl.is

Minnstu útflutningsverðmæti í sex ár

Þá er vakin athygli á því í greiningunni að keðjuverkun útflutnings sjávarafurða út í efnahagslífið eru töluveð.

„Í umræðunni um gjaldeyristekjur af einstaka útflutningsgreinum vill oft gleymast að það er ekki nóg að horfa einungis á brúttó útflutningstekjur, ef meta á framlag þeirra til gjaldeyrisöflunar eða verðmætasköpunar í hagkerfinu. Þar getur verið mikill munur á sem meðal annars má rekja til þess að útflutningsgreinar eru misháðar innfluttum aðföngum í sínum rekstri. Það hefur augljóslega áhrif á hversu miklar útflutningstekjur þær skapa í raun, nettó.“

Bent er á að 50 milljarða loðnuvertíð skili mun meira til þjóðarbúsins en neysla erlendra ferðamanna eða álútflutningur sem nemur sömu fjárhæð. „En hvað sem því líður er ljóst að þessar ólíku útflutningsgreinar, þ.e. sjávarútvegur, ferðaþjónusta og stóriðja, skipta allar máli fyrir gjaldeyrisöflun og verðmætasköpun í hagkerfinu.“

• 1 blogg um fréttina

Bloggað um fréttina

• Sigurjón Þórðarson: Ráð sem valda tjóni