Illa gengur að ná sýkta strokulaxinum

Illa hefur gengið að veiða 14 þúsund strokulaxa sem sluppu úr sjókvíum norska laxeldisfyrirtækisins Lerøy á eldissvæðinu Reitholmen í Noregi í byrjun mánaðarins. Talið er að þetta geti orðið eitt alvarlegast sleppingarmál Noregssögunnar þar sem greinst hefur á eldissvæðinu bæði nýrnasjúkdómur og brissjúkdómur.

Hafa umhverfissamtökin Norges Miljøvernforbund (NMF) kært rekstraraðilann Lerøy Midt, dótturfélag Lerøy Seafood, til norsku lögreglunnar.

Frétt af mbl.is

Miklar aðgerðir eftir að 14 þúsund laxar sluppu

Fram kemur í umfjöllun Børsen, viðskiptamiðils Dagbladet, að á föstudagskvöld hafði aðeins tekist að veiða 450 laxa þrátt fyrir að lagt hafi verið út fleiri þúsund metrar af netum.

Miðillinn hefur eftir Aud Skrudland hjá norsku matvælastofnuninni Mattilsynet að stofnunin hafi verið gert viðvart um að laxinn væri smitaður af nýrnasjúkdómi 7. mars og hafi um leið gripið til aðgerða sem miða að því að koma í veg fyrir að fiskurinn smiti út frá sér. Reglurnar snúa aðallega að því hvernig fiskurinn sé meðhöndlaður, en ekki fylgir þeim ákvæði um að fisknum beri að slátra um leið.

Skrudland segir nú ljóst að þurfi að breyta verklagi þegar lax reynist smitaður af alvarlegum sjúkdómum. „Meðal annars þurfum við að meta hvort strokhættan eigi að fá meira vægi þegar við ákveðum hvort fiskurinn fái að vera áfram í sjó eða hvort hann skuli slátraður.“

Harald Larssen, framkvæmdastjóri Lerøy Midt, segir umfangsmikla veiði standa yfir en á föstudagskvöldi hafði aðeins tekist að ná um 450 löxum. Fjögur sjóför taka þátt í veiðinni og hafa verið lagðir út 13 kílómetrar af netum til að endurheimta eldislaxinn.

Óttast sjúkdómar fari í dreifingu

„Við höfum stefnu um að kæra allar laxasleppingar, en þetta tilvik er sérstakt þar sem laxinn er alvarlega veikur,“ hefur E24 eftir Arne Roger Hansen, svæðisstjóra NMF í Mið-Noregi.

Sem fyrr segir hafa greinst tveir alvarlegir sjúkdómar á eldissvæðinu þaðan sem laxinn slapp, bæði nýrnasjúkdómur sem er af völdum bakteríu og brissjúkdómur af völdum veiru. Báðir sjúkdómarnir geta valdið dauða sérstaklega hjá seiðum.

Frétt af mbl.is

Strokulaxinn alvarlega sýktur

„Við óttumst að laxinn eigi eftir að ganga í ár og dreifa sjúkdómi í villtu laxastofnana í Þrændalögum,“ segir Hansen

NMF telur eðlilegt að Lerøy Midt verði sektað um 500 til þúsund norskar krónur fyrir hvern lax sem slapp úr eldi félagsins. Krafa samtakanna er því að heildarsektin verði á bilinu sjö til 14 milljóna norskra króna, sem er jafnvirði um 90 til 180 milljóna íslenskra krona.

• Blogga um frétt