Árni Þorsteinsson segir óhætt að fullyrða að nýi rafmagnsbíllin frá Audi, e-tron, hafi snert einhvern streng í hjörtum íslenskra kaupenda. „Sama dag og bíllinn var frumsýndur í San Francisco, um miðjan september, hófum við forsölu á heimasíðu Heklu og fyrstu vikuna höfðu borist pantanir í 25 bíla. Síðast þegar ég athugaði vorum við komin yfir 30 pantanir.“
Árni er vörumerkjastjóri Audi á Íslandi og segir hann þennan mikla áhuga á rafvæddum Audi-sportjeppa til marks um breyttar áherslur hjá kaupendum: „Þegar fyrsti VW Golf-rafmagnsbíllinn fór í sölu á sínum tíma þurfti að hafa meira fyrir því að selja bílana. Fólk kom í búðina, prófaði, og uppgötvaði hvað þessir bílar höfðu fram að færa og þeir seldust – en samt ekki áreynslulaust og eftirspurnin jókst hægum skrefum. Núna virðist markaðurinn orðinn þroskaðri, neytendur búnir að átta sig á öllum kostum rafmagnsbíla og tilbúnir að kaupa veglegan rafmagns-sportjeppa óséðan og nánast óverðlagðan,“ segir Árni og bætir við að áætlað grunnverð e-tron verði á bilinu 8,2 til 8,3 milljónir og fyrstu bílarnir væntanlegir frá framleiðanda á fyrsta ársfjórðungi 2019.
Að sögn Árna verður líka að skrifa góðu viðtökurnar á að Audi e-tron er rafmagnsbíll sem virðist sniðinn að íslenskum aðstæðum. „Hér er kominn 100% rafmagnaður fjórhjóladrifinn sportjeppi með drægni yfir 400 km samkvæmt nýjum og strangari stöðlum en yfir 525 km drægi samkvæmt eldri viðmiðum. E-tron er einnig með góða hraðhleðslumöguleika; í 22 kW heimahleðslustöð tekur um 5 klst. að fullhlaða rafhlöðurnar og á 150 kW hleðslustöð myndi taka um 20 mínútur að ná 80% hleðslu,“ útskýrir Árni. „Útlit bílsins fellur í kramið hjá þeim sem kunna að meta klassískt hönnunarmál Audi og vilja aka á bíl sem er ekki allt of framúrstefnulegur að sjá.“
Bætir Árni við að e-tron sé ríkulega útbúinn og Audi hafi hvergi slegið af þægindum og gæðum og er t.d. hæðarstillanleg loftpúðafjöðrun staðalbúnaður. „Þá verða þessir bílar seldir með 5 ára ábyrgð, og samtals 8 ára ábyrgð á rafhlöðunum, og munu kaupendur geta gengið að þjónustu vísri hjá umboðsaðilum Heklu um land allt.“