Æði fyrir litla jeppanum Suzuki Jimny er gengið í garð í Japan. Alþjóðlega bílasýningin í Tókýó var kraftbirting þess en þar voru sýndir yfir tuttugu Jimny sem breytt hafði verið mjög.
Fjöldi bílbreytingafyrirtækja mætti til leiks á sýningunni og sýndi þar afurðir sínar. Var ekkert í yfirbyggingunni eða hjólabúnaði þeim heilagt; allt var breytingum undirorpið. Annaðhvort stækkaðir Jimny, snaggaralegri eða hraðskreiðari; já eða allt þetta í einu.
Þá hafði yfirbyggingin á einum bílnum verið bókstaflega klippt í tvennt og sætum fækkað um helming til að rýma fyrir palli. Og í anda bílbreytinga íslenska fyrirtækisins Arctic Trucks var orðinn til trukkur að nafni Jimny Monster. Undir hann voru komin 40 tomma dekk og í vélarhúsinu býr nú afar öflug Nissan GTR V6-vél með tvöfaldri forþjöppu, eða sú hin sama vél og knúið hefur Toyota Hiace-jeppann.
Óhætt er að segja að Japanirnir koma stöðugt á óvart á sviði bílsmíði. agas@mbl.is