Skyggnst inn í bíla framtíðarinnar

Árleg bílasýning í Detriot í Michigan í Bandaríkjunum stendur nú sem hæst. Þar sýna bílaframleiðendur bæði bíla sem eru að koma á markað og einnig tilraunabíla sem hugsanlega gefa til kynna hvernig farartæki verða á götum eftir ár eða áratugi.

Það hefur vakið athygli á sýningunni að bílaframleiðendur virðast ætla að veðja á að sportjeppar og -jepplingar séu að leysa hefðbundna fjölskyldubíla af hólmi en sala á litlum og miðlungsstórum fjölskyldubílum hefur dregist saman í Bandaríkjunum síðustu ár.

Því eru fáir slíkir bílar til sýnis í Detroit. Meira er um sportjeppa, öfluga pallbíla, stóra jeppa og sportbíla. „Bílafyrirtæki gera sér grein fyrir því að sportjeppasprengingin mun halda áfram,“ hefur AFP-fréttastofan eftir Michelle Krebs, sérfræðingi hjá bílablaðinu Autotrader.

Meðfylgjandi 20  ljósmyndir frá Detroit varpa nokkru ljósi á sýninguna.