Nýr smájeppi í plönum Toyota

Þegar Toyota og Mazda skýrðu frá áformum þess efnis að reisa sameiginlega bílsmiðju í Huntsville í Alabamaríki í Bandaríkjunum virtist tilgangurinn ljós.

Mazda hugðist smíða jeppa eingöngu til sölu í Bandaríkjunum og Kanada og Toyota ætlaði að með smiðjunni að auka afköst við framleiðslu Corolla.

Eitthvað hefur þetta breyst því Toyota hefur ákveðið að smíða þar í staðinn nýjan en nánar ótilgreindan jeppa. Talið er að þar sé fremur um jeppling að ræða; bíl sem verður nokkru minni en RAV4-jeppinn en álíka stór og C-HR jepplingurinn sem er bara með drif á framhjólunum.

Toyota gaf fyrst til kynna á bílasýningunni í New York í hitteðfyrra, 2017, að lítill jeppi væri í pípunum. Mætti fyrirtækið þangað með kassalaga FT-4X þróunarbílinn sem var styttri en C-HR en breiðari og með meiri jarðfirð til aksturs á malarslóðum. Af öllum hugmyndabílum Toyota í seinni tíð er FT-4X sá eini sem hefur ekki enn getið af sér framleiðslueintak.

Toyota kvaðst vera að kanna viðbrögð almennings og umboðsmanna til bílsins áður en grænt ljós yrði gefið á framleiðslu hans. Hafi þau verið jákvæð þá er tíminn frá því bíll er á hugmyndastigi og þar til hann er klár í raðsmíði um tvö til þrjú ár.

Nýi jepplingurinn verður sýndur umboðsaðilum Toyota á lokuðum fundi með þeim í Las Vegas í september. Þar sem jeppar og jepplingar rokseljast um þessar mundir þykir ákvörðun Toyota að auka áherslu á slíkra bíla ekki koma á óvart.