Ofursportbíll sem kemst langt á vetninu

Vart líður sú vika að ekki séu færðar fréttir af nýjum bílum lítilla framleiðenda, gjarnar ofurbílum sem yfirleitt eru ekki hugsaðir til fjöldaframleiðslu.

Einn slíkur er hinn vetnisknúni Hyperion XP-1 frá samnefndu kalifornísku tæknifyrirtæki. Stílsterkur og kraftalegur að sjá er þessi ofurbíll. Hann er gefinn upp með eitt þúsund kílómetra drægi. Ekkert hefur verið látið uppi um afköst Hyperion XP-1 og hvað geymar hans taka við miklu vetni. Sagt er að hann sé búinn þriggja þrepa gírkassa og komist í hundraðið úr kyrrstöðu á aðeins 2,2 sekúndum og topphraðinn sé yfir 350 km/klst.

Hermt er að tómaþyngd bílsins sé 1.032 kíló en ekki liggur fyrir hvort það sé endanleg vigt.

Títan og koltrefjar eru byggingarefni bílsins, sem sagður er munu koma á markað árið 2022. Áætlar Hyperion að smíða alls 300 XP-1-bíla. agas@mbl.is