Fjórða kynslóð Yaris er nú komin í sýningarsali hjá viðurkenndum söluaðilum Toyota í Kauptúni, Reykjanesbæ á Akureyri og Selfossi þar sem einnig má reynsluaka þessum sívinsæla bíl.
„Yaris kom fyrst fram á sjónarsviðið árið 1999 og var frumsýndur á Íslandi í mars það ár. Bíllinn sló rækilega í gegn frá fyrsta degi og markaði það upphafið að velgengni Yaris á íslenskum bílamarkaði sem stendur enn,“ segir í tilkynningu.
Alls hafa 14.074 Yarisar verið skráðir hér á landi og af þeim eru 11.609 eða 82,5% enn í notkun. Tölurnar sýna að Yaris hefur verið einn vinsælasti bíllinn á Íslandi. Oft hefur verið sagt um Yaris að hann sé risasmár og það á einnig við um nýjan Yaris sem tekur ekki mikið pláss á götunni en rúmar samt nýja spræka bensínvél, tvinnkerfiið sem tryggir lítinn útblástur og litla bensíneyðslu, Toyota Safety Sense öryggiskerfið, farangur og fjóra farþega auk ökumanns.
Nýr Yaris er fáanlegur í nokkrum útfærslum og auðvelt er að sníða bílinn að þörfum hvers og eins. Verð á Yaris með 1,0 lítra bensínvél er frá 3.240.000 kr. Yaris með 1,5 lítra bensínvél og Yaris Hybrid kosta frá 3.770.000 kr.