Í Geldingadölum steikti einhver beikon á heitu hrauninu, annar mætti með mokkakaffikönnu, en í Gvatemala hefur David Garcia byrjað sinn eigin rekstur á hægfljótandi hrauninu frá Pacaya-eldfjalli.
Það eru margar mismunandi leiðir til að baka hina fullkomnu pítsu. Einhverjir notast við pítsuofn, sumir skella pítsusteini á grillið sitt og aðrir baka sínar í eldofnum.
En hinn þrjátíu og fjögurra ára gamli Gvatemali og endurskoðandi David Garcia er hins vegar sannfærður um að besta leiðin til að baka pítsur sé á sjóðandi heitu hrauni.
David Garcia rekur pítsustaðinn Pacaya Pizza á hraunjaðrinum við Pacaya-eldfjall. Þangað gengur hann daglega úr nálægu þorpi með vinnuborðið sitt, áleggið og deigið.
„Ég fæ fjölmarga ferðamenn til mín á hverjum degi sem vilja smakka pítsurnar mínar,“ segir Garcia. Hann notar öfluga eldvarnarhanska þegar hann kemur pítsunni þægilega fyrir á heitu hrauninu. Bakkinn sem hann notar er úr málmi sem þolir allt að þúsund gráðu hita.
Tíu mínútum síðar er hún tilbúin. Ljúffengar pítsusneiðar fyrir þreytta ferðalanga.
Eldfjallið Pacaya í Gvatemala byrjaði að gjósa í febrúar. Fjallið er í tvö þúsund og fimm hundruð metra hæð yfir sjávarmáli og er eitt virkasta eldfjall landsins, en í Gvatemala eru talin vera um 38 virk eldfjöll. Gosið er ekkert ósvipað því sem er í Geldingadölum, það er hægfara hraunrennsli og tilheyrandi gasmengun.