Á spítala fyrir hlutverk Jobs

Asthon Kutcher lagði mikið á sig til að vera sem trúverðugastur sem Steve Jobs í kvikmyndinni um Apple-stofnandann. Lenti hann inni á spítala um tíma.

„Fyrir það fyrsta leiddi ávaxtakúrinn til vandamála,“ sagði Kutcher í viðtali við dagblaðið USA Today á dögunum. Undirgekkst hann strangan megrunarkúr í aðdraganda myndarinnar til að líkjast Jobs sem best. Þurfti leikarinn m.a. að leggjast inn á spítala um nokkurra daga skeið vegna kvala í kviðarholi skömmu áður en tökur á myndinni hófust.

Virðist sem starfsemi briskirtils leikarans hafi farið öll úr skorðum við breytinguna á mataræðinu, sem Kutcher segir hafa verið einkar ógnvænlegt, ekki síst í ljósi þess hverjum hann hafi verið að reyna að líkjast. Jobs lést sem kunnugt er í október 2011 eftir harða baráttu við krabbamein í brisi.

Þarf kjark til að halda áfram

Kutcher fór annars fögrum orðum um fyrirmyndina að hlutverki sínu í fyrrnefndu viðtali. Segist hann hafa tengt við frumkvöðulinn á ýmsum sviðum.

„Hann [Jobs] var þessi náungi sem „féll af baki“ um stund. Ég held að við getum öll tengt við slíkt á einhverjum tíma lífs okkar, þegar við erum á góðri siglingu með eitthvað en missum allt í einu dampinn,“ sagði hinn 34 ára leikari. „Það þarf kjark til að standa aftur upp og leggja til atlögu á ný,“ bætti hann við og vísaði þar til þess þegar Jobs settist aftur í forstjórastólinn hjá Apple, sem þá var í töluverðri lægð frá því hann hafði sagt skilið við fyrirtækið. Sagðist leikarinn vona að hann byggi yfir þessum sama eiginleika og Jobs gerði.

Kvikmyndin „jOBS“ verður frumsýnd á lokadegi Sundance-kvikmyndahátíðarinnar sem fram fer þessa dagana í Utah.

Ashton Kutcher sem Steve Jobs í kvikmyndinni um hinn síðarnefnda. STR

• Blogga um frétt