Passar betur upp á einkalífið

Ashton Kutcher segist hafa lært af reynslunni og mun ekki vera jafn iðinn við að deila lífi sínu með fólki á samfélagsmiðlum í framtíðinni.

„Af biturri reynslu hef ég lært hversu mikils virði einkalífið er,“ segir leikarinn í viðtali við nýjasta tölublað ELLE. Bætti hann við að betur færi á að halda ýmsum hlutum utan sviðsljóssins, þar ekki síst ástarsamböndum.

Þekkt er að leikarinn og fyrrum kona hans, Demi Moore, voru ófeimin við að leyfa aðdáendum að fylgjast með einkalífi þeirra á samfélagsmiðlum hér áður fyrr. Nú er hann hins vegar með Milu Kunis, sem er minna fyrir athyglina umfram það sem frami hennar krefst, og virðist hann ákveðinn í að taka hana sér til fyrirmyndar í þessum efnum. Hefur parið til dæmis ekki enn staðfest opinberlega að þau séu saman, þrátt fyrir að það fari ekki á milli mála.

„Ég ætla að gera allt sem í mínu valdi felst til að halda þessu sambandi prívat,“ bætti Kutcher við og sagði fólk og fjölmiðla hvort sem er myndu fylla í eyðurnar eins og þeir vildu.

• Blogga um frétt