Asthon Kutcher og Demi Moore hefur ekki enn náð saman um skilnaðarpappírana Deila þau m.a. um 10 milljóna dala eign leikarans í fjárfestingarsjóði.
Samkvæmt heimildum New York Post hafa samningaviðræður um uppgjör eigna þeirra gengið treglega, ekki síst eftir að leikkonan fór fram á hlutdeild í hagnaði Kutchers af eign hans í fjárfestingasjóðnum A-Grade.
Fjárfestingasjóðinn á Kutcher í félagi við umboðsmann Madonnu, Guy Oseary, og milljarðamæringinn Ron Burkle. Sérhæfir félagið sig í fjárfestingum í nýsköpunar- og tæknifyrirtækjum og er talið hafa hagnast mikið á undanförnum árum.
„Ashton setti A-Grade á fót með Oseary og Burkle árið 2010, á meðan hann og Demi voru enn saman,“ hefur blaðið eftir heimildamanni sínum. Segir sá að á meðan Kutcher haldi því fram að félagið hafi lítið sem ekkert hagnast, hefur komið í ljós að hann og meðeigendur hans kynna félagið fyrir fjárfestum sem 100 milljóna dala virði. Þar sem Kutcher á 20% hlut í félaginu ætti Moore þar af leiðandi rétt á hlut að virði 10 milljóna dala.
Samningaviðræður standa yfir og er vonandi að lausn finnist í málinu hið fyrsta. Hafa viðræðurnar staðið yfir allt frá því í nóvember 2011 þegar fyrst var tilkynnt um skilnaðinn. Hafði parið þá verið gift um sex ára skeið eða frá árinu 2005.