Tónlistarmaðurinn Neil Diamond greindi frá því í gær að hann hafi verið greindur með Parkinson-sjúkdóminn og myndi ekki taka þátt í fleiri tónleikaferðalögum. Hann hefur því hætt við tónleikaferðalag um Ástralíu og Nýja-Sjáland.
Diamond, sem verður 77 ára á morgun, segir að þrátt fyrir þetta muni hann halda tónsmíðum áfram og upptökum.
Hann segir að það séu mikil vonbrigði að þurfa að hætta að koma fram á tónleikum en hann fagnar 50 ára ferli um þessar mundir.
Meðal þekktra laga Diamon er lagið Sweet Caroline og vísaði hann í það lag þegar hann þakkaði aðdáendum sínum fyrir samfylgdina undanfarna áratugi. Lög eins og Girl, You'll Be a Woman Soon og Cracklin' Rosie hafa einnig notið gríðarlegra vinsælda.
Diamond hætti námi við New York háskólann á sínum tíma til þess að geta einbeitt sér að lagasmíðum en hann samdi fyrir hljómsveitir eins og The Monkees á sínum tíma.