Connie Simpson, betur þekkt sem barnfóstra stjarnanna, er að gefa út foreldrahandbókina The Nannie Connie Way: Secrets to Mastering the First Four Months of Parenthood. ET greinir frá því að í bókinni segi leikkonan Jessica Biel frá því að fæðingarplön hennar og Justins Timberlakes hafi ekki gengið upp.
Biel lýsir því í bókinni að þau hafi verið með tvær ljósmæður, dúla hafi verið á staðnum, þau hafi tekið hugleiðslutíma fyrir fæðinguna og lesið hippabækur. Þetta skipulag gekk þó ekki upp og þurfti Biel að fara í bráðakeisara.
„Við komum heim búin á því, vonsvikin og gjörsamlega í áfalli. Ég var heltekin af öllu lífrænu, eiturefnalausu, náttúrulegu og hómópatísku fyrir barnið okkar sem kom í þennan heim í skurðstofu í gegnum skurð. Ég var einræðisherra sem gerði mig sjálfa og eiginmann minn brjálaðan.“