Ozzy gamli Osbourne er allur að koma til eftir að hafa veikst heiftarlega af lungnabólgu og hrasað í þokkabót á heimili sínu síðasta vor með þeim afleiðingum að hann aflýsti öllu tónleikahaldi út árið. Nú er kappinn búinn að stilla upp Evróputúr næsta haust, sem hefst í Newcastle 23. október og lýkur í Helsinki 7. desember 2020. Upphitunaratriðið verður ekki af lakara taginu; sjálf málmtröllin í Judas Priest.
„Ég get ekki beðið eftir að rífa mig upp á rassinum og keyra mig í gang,“ sagði í yfirlýsingu frá Ozzy, „en þið verðið að sýna smá meiri þolinmæði. Ég vil vera 100% tilbúinn til að rokka af ykkur helvítis sokkana. Ég er ekki að setjast í helgan stein; giggin bíða mín áfram, auk þess sem ný plata er á leiðinni.“ Guð sé Ozz næstur.