Spænski leikarinn Antonio Banderas var valinn besti leikarinn á Evrópsku kvikmyndaverðlaununum í kvöld en Ingvar E. Sigurðsson var meðal tilnefndra. Hlaut Banderas verðlaunin fyrir leik sinn í Dolor y gloria, eða Kvöl og dýrð, eftir leikstjórann Pedro Almodóvar.
Ingvar var tilnefndur fyrir leik sinn í Hvítur, hvitur dagur sem hann hefur hlotið mikið lof fyrir og verðlaun, m.a. á kvikmyndahátíðinni í Cannes. Samkeppnin var hörð á verðlaununum og ljóst að tilnefningin hefur aukið hróður kvikmyndarinnar sem er eftir Hlyn Pálmason. Evrópsku kvikmyndaverðlaunin verða afhent í Reykjavík á næsta ári og er undirbúningur þegar hafinn fyrir þá hátíð.