Tónlistarmaðurinn Helgi Björnsson heldur uppi stuðinu á heimilum Íslendinga í kvöld ásamt Reiðmönnum vindanna. Efnt er til kvöldvöku á heimilum landsmanna í samstarfi Sjónvarps Símans, mbl.is og K100.
Óhætt er að segja að Helgi Björns og félagar hafi slegið í gegn síðustu tvö laugardagskvöld. Viðtökurnar hafa verið hreint út sagt ótrúlegar þar sem þjóðin hefur sameinast í söng yfir sjónvarpinu
Helgi mun ásamt gestum syngja nokkur af sínum þekktustu lögum ásamt vinsælum dægurlagaperlum.
Í síðasta þætti söng Salka sól fallega útgáfu af hugljúfum slagara Sprengjuhallarinnar, Verum í sambandi. Hún er aftur á móti ekki með í kvöld þar sem hún er í sóttkví að sögn Helga.
Tónleikarnir hefjast kl 20:00 og þeim er streymt hér á mbl.is og útvarpsstöðinni K100.
Þjóðin hefur sem fyrr kost á að taka þátt í lagavali og senda inn kveðjur í gegnum viðburð á facebooksíðu Símans.