Alma Wahlberg, móðir leikaranna Donnies og Marks Wahlbergs, er látin 78 ára að aldri. Walhberg-bræður minntust móður sinnar á samfélagsmiðlum í dag.
Þeir greindu ekki frá dánarorsökinni en Alma hafði áður greinst með elliglöp.
„Engilinn minn. Hvíldu í friði,“ skrifaði Mark undir fallega mynd af móður sinni.
„Fyrir Ölmu. Það var mín blessun í lífinu að svo mögnuð kona skyldi fæða mig í þennan heim, ala mig upp og kenna mér á lífið,“ skrifaði Donnie við myndband.
Alma eignaðist alls níu börn, þau Arthur, Paul, Jim, Robert, Michelle, Debbie, Tracey, Mark og Donnie. Hún tók virkan þátt í raunveruleikaþáttum fjölskyldunnar, Wahlburgers.