Reebok losnar undan Adidas

Íþróttavöruframleiðandinn Adidas hefur selt dótturfyrirtæki sitt, Rebook, til stórfyrirtækisins Authentic Brands Group (ABG). Undanfarin ár hefur vörumerkið Reebok verið að sækja í sig veðrið og er orðið vinsælt aftur eftir erfiðan áratug. 

Adidas keypti Reebok árið 2006 til þess að ná markaðshlutdeild af Nike í Bandaríkjunum. Það misheppnaðist og Reebok hvarf nánast af skómarkaðinum. Þegar Kasper Rorsted tók við sem nýr forstjóri Adidas árið 2016 réðst hann strax í stefnumótunarvinnu með það að markmiði að auka sölu á Reebok-skóm.

Aðgerðirnar eru fyrst núna að skila sér fyrir tilstuðlan markaðsherðferðar Rorsted en Adidas gerði meðal annars stóran auglýsingasamning við tónlistarkonuna Cardi B fyrir Reebok. Svo skemmir ekki fyrir að tíska níunda áratugarins þykir nú afar móðins en á þeim tíma reis veldi Reebok hæst.

Cardi B er með auglýsingasamning við Reebok Skjáskot/Instagram

Nú hefur ABG tryggt sér vörumerkið og stefnir á að auka vinsældir þess á næstu árum. Innan ABG-samsteypunnar er að finna fjölmargar fataverslanir eins og Forever 21, Brooks Brothers, Aeropostale, Barneys New York og Volcom. 

ABG-samsteypan er einnig afkastamikil hvað viðkemur höfundarrétti fræga fólksins. Meðal þeirra eru tónlistargoðsögnin Elvis Presley, körfuboltahetjurnar Shaq og Julius Erving, hnefaleikameistarinn Muhammad Ali, leikkonan Marilyn Monroe og golfarinn Greg Norman.

Frétt New York Times

• Blogga um frétt