Sidney Poitier er látinn

Hollywood leikarinn Sidney Poitier er látinn 94 ára að aldri. Poitier leiddi réttindabaráttu svartra í kvikmyndaheiminum.

Poitier var fyrsti svarti karlleikarinn til að hljóta tilnefningu til Óskarsverðlauna fyrir hlutverk sitt í The Defiant Ones árið 1958. Sex árum seinna var hann fyrsti svarti karlmaðurinn til að vinna Óskarsverðlaun sem leikari í aðalhlutverki fyrir kvikmyndina Lilies of the Field. 

Poitier var með ríkisborgararétt í Bandaríkjunum og á Bahamaeyjum en ríkisstjórn Bahamaeyja greindi frá andláti hans. 

Poitier var sæmdur heiðursverðlaunum á Óskarsverðlaunahátíðinni árið 2002 fyrir ævistarf sitt. 

Hann var fæddur í Flórídaríki árið 1927. Faðir hans ræktaði tómata og seldi afurðir sínar í Flórída en þegar Poitier var barn fluttist fjölskyldan búferlum til Bahamaeyja. Þar lærði hann að kunna meta kvikmyndir og þegar hann var 15 ára flutti aftur til Miami í Flórída. 

Skömmu seinna flutti hann til New York borgar. Þar vann hann sem uppvaskari á veitingastað. Hann þjónaði í bandaríska hernum sem sjúkraþjálfari í seinni heimstyrjöld en eftir stríðið sneri hann aftur til New York og lét reyna á þann draum að verða leikari. 

Hann lætur eftir sig eiginkonu sína Johönnu, sem hann hafði verið giftur síðan 1976, og sex uppkomin börn auk fjölda barnabarna og barnabarnabarna.

• Blogga um frétt