Bandaríski leikarinn James Caan er látinn 82 ára að aldri.
Caan, sem átti farsælan feril í Hollywood, var einna þekktastur fyrir að leika í kvikmyndinni Guðfaðirinn frá árinu 1972, en hann hlaut tilnefningu til Óskarsins árið 1973 fyrir hlutverk sitt í myndinni. Hann var einnig tilnefndur til Emmy og Golden Globe-verðlauna á ferlinum.
Fjölskylda leikarans greindi frá andlátinu og þakkaði öllum fyrir sýndan stuðning og hlýhug.
Caan, sem fæddist í New York árið 1940, kvæntist fjórum sinnum og lætur eftir sig fimm börn. Caan stefndi upphaflega á að gerast atvinnumaður í amerískum fótbolta en fékk síðar áhuga á leiklist þegar hann hóf nám við Hofstra University. Þar kynntist hann leikstjóranum Francis Ford Coppola, sem leikstýrði Guðföður-þríleiknum.
Eftir nokkur ár þar sem hann lék í lítt þekktum sjónvarpsþáttum og kvikmyndum fékk hann stóra tækifærið árið 1965 þegar hann lék í tveimur kvikmyndum leikstjórans Howard Hawks: Red Line 7000 og El Dorado. En það var í Guðföðurnum sem Caan skaust endanlega á stjörnuhimininn.