Fyrrverandi leikkonan og barnastjarnan Amanda Bynes hefur verið útskrifuð af geðdeild, tveimur vikum eftir að hún var nauðungarvistuð þar í annað skiptið á þessu ári. Við útskriftina fékk Bynes ítarlega áætlun sem hún á að fylgja til að tryggja velferð hennar í bataferlinu, en hún glímir við geðhvarfasýki.
Samkvæmt heimildarmanni TMZ töldu læknar að Bynes hafi náð miklum framförum á meðan hún var á sjúkrahúsi og mun hún nú halda bataferlinu áfram heima hjá sér. Læknir mun þó fylgjast með Bynes daglega til að tryggja að hún haldi sig við bataáætlunina og taki lyfin sín.
Bynes var nauðungarvistuð eftir að hún hringdi sjálf í lögregluna til að tilkynna konu í maníukasti. Í kjölfarið var leikkonan handtekin og vistuð á geðdeild eftir að hafa undirgengist geðmat.