Guðlaugur Þór hitti Haaland

Guðlaugur Þór Þórðarson, umhverfis-, orku- og loftslagsráðherra, er harður Liverpool aðdáandi og gerði upp tímabilið með færslu á Facebook. Hann greindi meðal annars frá því þegar hann hitti Alf Inge Haaland.

„Hittum Alf Inge Haaland, hann var kátur og það var gengið frá skiptum á Darwin og Erling. Hef pínu áhyggjur hvort það var skynsamlegt eftir að hafa horft á leikinn í gær,“ skrifar hann á Facebook um ferð sína ásamt vinum á leik Liverpool og Tottenham í byrjun mánaðar.

Alf Inge Haaland er sjálfur fyrrum fótboltakempa sem spilaði meðal annars með norska landsliðinu og Manchester City. Í dag er hann þó ekki síst þekktur fyrir að vera faðir Erling Haaland sem hefur farið með himinskautum með Manchester City í ensku úrvalsdeildinni.

„Enska tímabilinu lokið. Keisarinn hættur [Jurgen Klopp] og deildarbikar í safnið. Ferðin með æskufélögunum úr Böðvarsgötunni var stórkostleg. Fullkomin forréttindi að eiga vini frá frumbernsku. Skemmtum okkur konunglega og mikið hlegið,“ skrifar hann meðal annars.

• Blogga um frétt