Franski stjórnmálamaðurinn Benoit Hamon hefur sagt sig úr franska Sósíalistaflokknum og ætlar að stofna nýja hreyfingu sem á að „endurreisa vinstrið“ samkvæmt frétt AFP.

Hamon tilkynnti úrsögn sína úr flokknum í gær. „Í dag hef ég ákveðið að hætta í Sósíalistaflokknum. Ég er að hætta í flokknum en ég gefst ekki upp á hugmyndum sósíalismans,“ sagði Hamon fyrir framan 11.000 áhorfendur.

Hamon, sem er fyrrverandi menntamálaráðherra Frakklands, hlaut mörgum að óvörum tilnefningu flokksins til forsetakosninganna í landinu fyrr á árinu. Hann tapaði þó í fyrstu umferð kosninganna með aðeins 6,2% atkvæða.