Mikið uppnám ríkir innan Hisbollah-samtakanna eftir að tveir af leiðtogum hryðjuverkahópsins voru drepnir í loftárás Ísraelsmanna í Líbanon í gær. Þarlend yfirvöld hafa gefið það út að 37 hafi látist í árásinni.

Í kjölfar árásarinnar gáfu ísraelsk yfirvöld út að Ibrahim Aqil, leiðtogi Radwan-hópsins sem er aðgerðaarmur Hisbollah-samtakanna, hafi fallið í árásinni auk nokkurra annarra hátt settra liðsmanna samtakanna.

Aqil stóð meðal annars fyrir sprengjuárás í sendiráði Bandaríkjanna í Líbanon árið 1983.

Hisbollah hefur staðfest dauða Aqil og gefið út að annar háttsettur yfirmaður í samtökunum, Ahmed Mahmud Wahbi, hafi einnig verið drepinn. Hann stýrði aðgerðum samtakanna gegn Ísrael frá upphafi Gasa-stríðsins í október og þar til í byrjun þessa árs.

Frétt af mbl.is

Æðsti yfirmaður Hisbollah drepinn í árás Ísraels

Frétt af mbl.is

Gerðu umfangsmiklar loftárásir á Líbanon

Þrjú börn meðal þeirra látnu

Firass Abiad heilbrigðismálaráðherra Líbanon hefur gefið út að þrjú börn hafi látist í árás gærdagsins sem var miðuð að neðanjarðarfundarherbergi Hisbollah, en fréttamenn AFP á svæðinu segja að árásin hafi eyðilagt mikið svæði í þéttbýlu íbúahverfi.

Abiad segir að sjúkraflutningafólk hafi verið í alla nótt við að endurheimta lík og bjarga særðum borgurum úr rústum árásarinnar en fjölbýlishús féll í kjölfar hennar.

Árásin er ekki sú fyrsta sem Ísrael stendur fyrir gegn Hisbollah í Líbanon í vikunni en í tveimur árásum, þar sem fjöldi fjarskiptatækja Hisbollah-liða voru sprengd í loft upp, létu 37 lífið.

Árásirnar hafa vakið upp spurningar um öryggisinnviði Hisbollah.

Frétt af mbl.is

Fjarskiptatæki um alla borg sprungu samtímis

Miklar áhyggjur

Mikilla áhyggja hefur gætt innan alþjóðasamfélagsins vegna aukinnar spennu í Mið-Austurlöndum í kjölfar árása Ísraelshers í Líbanon.

Stephane Dujarric, talsmaður Antonio Guterres, aðalritara Sameinuðu þjóðanna, hefur meðal annars sagt að stofnunin hafi „mjög miklar áhyggjur af aukinni stigmögnun“ vegna ástandsins.

Öryggisráð Sameinuðu þjóðanna fundaði um ástandið í gær.

Ekkert skjól fyrir óvini

Ísraelskir hermenn og Hisbollah-vígamenn hafa barist við landamæri Ísraels og Líbanons síðan stríðið á Gasa hófst 7. október.

Áhersla Ísraelshers hefur þó verið á Hamas-samtökin en nú þegar staða þeirra er orðin mun veikari hefur hún færst í ríkara mæli til Hisbollah-samtakanna.

Varnamálaráðherra Ísraels, Yoav Gallant, hefur sagt að „óvinir“ Ísraels muni ekkert skjól finna, ekki einu sinni í úthverfum Beirút.

Stríðssvæðið stækkað

Talsmaður Ísraelshers hefur þó haldið því fram að ekki sé um að ræða stigmögnun í átökum en Hamas-samtökin taka ekki í sama streng.

Í yfirlýsingu frá samtökunum hafa þau kallað árásirnar í Líbanon „grimmdarlegar og hryðjuverk“.

Þá hafa írönsk yfirvöld, sem styðja fjárhagslega við Hisbollah, sagt að með árásunum séu Ísraelar að „stækka landfræðilegt rými stríðsins“ á Gasa.