Bandaríska söngkonan Ashley Nicolette Frangipane, best þekkt undir listamannsnafninu Halsey, er komin aftur heim eftir nokkurra daga dvöl á sjúkrahúsi. Söngkonan sem glímir við sjálfsofnæmissjúkdóminn rauða úlfa (e. lupus) fékk slæmt flogakast og var flutt með snatri á sjúkrahús.

Halsey deildi myndskeiði á Instagram-síðu sinni á miðvikudag þar sem hún liggur í sjúkrarúmi, tengd við ýmis tæki. Söngkonan óskaði fylgjendum sínum til hamingju með Late Bi Visibility-daginn ásamt unnusta sínum Avan Jogia.

Halsey svaraði einnig nokkrum spurningum frá aðdáendum, sem vildu vita um líðan söngkonunnar, á samfélagsmiðlasíðunni X, áður þekkt sem Twitter, og greindi frá því að hún væri komin heim. 

„Ég er komin heim af spítalanum. Ég fékk flog, mjög óhugnanlegt, mæli alls ekki með.“