Arababandalaginu nóg boðið

Arababandalagið hefur lagt bann við því að 19 sýrlenskir embættismenn ferðist til annarra arabalanda. Banninu verður því aðeins aflétt ef sýrlensk yfirvöld leyfa alþjóðlegum eftirlitsmönnum að koma inn í landið og fylgjast með mótmælunum í landinu. Eignir þessara embættismanna í arabalöndunum hafa að auki verið frystar.

Meðal þeirra eru Maher al-Assad, sem er bróðir Assads Sýrlandsforseta, og frændi hans. Einnig er um að ræða Rami Makhluf, sem er eigandi stórs fjarskiptafyrirtækis, og yfirmenn í her og leyniþjónustu landsins.

Að auki ákvað Arababandalagið að leyfa einungis helming venjubundinna flugferða til og frá Sýrlandi. Þær takmarkanir ganga í gildi 15. desember.

Þessi skilyrði voru sett fyrr í kvöld, en í dag létust 23 í mótmælum í Sýrlandi. Mannréttindaráð Sameinuðu þjóðanna hvetur til harðra aðgerða gagnvart Sýrlandi og fordæmir það sem það kallar gróf mannréttindabrot.

Skilyrði Arababandalagsins voru tilkynnt eftir fund bandalagsins í Doha, höfuðborg Katar. Forsætisráðherra Katar, Sheikh Hamad bin Jassim al-Thani, hvatti Sýrlendinga til að hleypa eftirlitsmönnum inn í landið.

„Við höfum haft samband við sýrlensk yfirvöld og boðið þeim að koma til Doha og skrifa undir samning  um að opna landið fyrir eftirlitsmönnum,“ sagði al-Thani. „Við bíðum eftir svari.“

• Blogga um frétt