Að minnsta kosti tíu eru látnir og fimmtán særðir eftir sprengingu sem varð á einum helsta ferðamannastað Istanbúl í morgun. Grunur leikur á að um hryðjuverkaárás hafi verið að ræða.

Sprengingin var mjög kraftmikil og heyrðist vel í hinu sögufræga Sultanahmet-hverfi en þar eru helstu minnismerki borgarinnar og heimsækja tugir þúsunda ferðamanna hverfið á hverjum degi.

Mikil spenna er í Tyrklandi í kjölfar blóðugra sprengjuárása á síðasta ári sem Ríki íslams lýsti ábyrgð á. Til að mynda létu 103 lífið í tvöfaldri sjálfmorðssprengingu í Ankara í október.

„Það leikur grunur á að um hryðjuverk sé að ræða,“ sagði tyrkneskur embættismaður í samtali við AFP. Hann vildi ekki koma fram undir nafni.

Óstaðfestar heimildir herma að maður hafi gengið að hópi ferðamanna á Sultanahmet-torgi og sprengt sig í loft upp. Á torginu eru margir af helstu ferðamannastöðum borgarinnar, til að mynda Bláa moskan og Hagia Sophia eða Ægissif.

Í yfirlýsingu frá skrifstofu ríkisstjóra Istanbúl kemur fram að nú sé verið að rannsaka sprenginguna og mögulega gerendur. Tyrkneski miðillinn Dogan hefur birt myndir af vettvangi þar sem má sjá lík á jörðinni.

Sprengingin varð um klukkan 10:20 að staðartíma í morgun við Dikilitaş-broddsúluna, sem er minnismerki frá Forn-Egyptalandi. Súlan var endurreist af rómverska keisaranum Þeódósíusi í borginni á fjórðu öld eftir Krist. Súlan er einn vinsælasti ferðamannastaður borgarinnar.

Þá logar jafnframt eldur í hóteli sem verið er að byggja í Gülsuyu-hverfi borgarinnar. Samkvæmt frétt tyrkneska miðilsins Today's Zaman kviknaði eldurinn klukkan 10:30 í morgun að staðartíma, aðeins tíu mínútum eftir að sprengjan sprakk á Sultanahmet-torgi. 

Ekki liggur fyrir hvað gerðist en að sögn vitna heyrðist sprenging áður en eldurinn sást. Að sögn Cihan-fréttamiðilsins voru margir iðnaðarmenn fastir inni í byggingunni.

Bæjarstjóri Maltepe, þar sem Gülsuyu-hverfið stendur, greindi frá því á Twitter að öllum hefði verið bjargað úr húsinu. Nú er unnið að því að slökkva eldinn.