Konur í Sádi-Arabíu munu á föstudag í fyrsta skipti geta verið á meðal áhorfenda á knattspyrnuleik þar í landi en ríkisstjórn landsins hefur greint frá þessu.
„Fyrsti leikurinn sem konur mega horfa á verður viðureign Al-Ahli og Al-Batin, föstudaginn 12. janúar,“ kom fram í tilkynningu frá upplýsingamálaráðuneyti Sádi-Arabíu í dag.
Þar kom einnig fram að konur gætu mætt á annan leik á laugardaginn og þriðja leikinn 18. janúar.
Konur í Sádi-Arabíu sæta mikilli mismunun. Stutt er síðan ákveðið var að þær mættu keyra á þessu ári en strangar reglur gilda um aðgreiningu kynjanna á opinberum stöðum.
Stjórnvöld í landinu hleyptu konum inn á íþróttaleikvang í fyrsta sinn til að taka þátt í þjóðhátíðardegi landsins með fjölskyldum sínum í september í fyrra.
Mohammed bin Salman krónprins er sagður nútímalegri og ekki jafn íhaldssamur og faðir hans, Salman konungur, en krónprinsinn reynir að nútímavæða landið að einhverju leyti.