Lögfræðingur Trump borgaði féð úr eigin vasa
Setja bókamerki
Lögfræðingur Donalds Trump Bandaríkjaforseta, greindi í gær frá því að hann hefði greitt 130.000 dollara úr eigin vasa til klámmyndaleikkonu sem átti í meintu sambandi við Trump áður en hann varð forseti.
Í yfirlýsingu frá lögfræðingnum, Michael Cohen, kveðst hann hafa greitt Stephanie Clifford, sem gengur undir leikaranafninu Stormy Daniels, 130.000 dollara (rúmar 13 milljónir kr.) úr eigin vasa. „Hvorki Trump-samsteypan né forsetaframboð Trumps átti hlut í greiðslunni til fröken Clifford, né heldur var mér endurgreitt fyrir hana með beinum eða óbeinum hætti,“ segir í yfirlýsingunni.
Fréttastofa CNN segir Cohen hafa stofnað einkafyrirtæki aðeins nokkrum vikum fyrir forsetakosningarnar til að halda utan um greiðsluna til Clifford. Wall Street Journal greindi frá því í janúar á þessu ári að Clifford hafi átt í meintu sambandi við Trump í júlí 2006.
Eftir að fréttir bárust af því að Cohen hefði greitt Clifford fyrir að tjá sig ekki um sambandið við forsetann, neitaði hann því í fyrstu harðlega að hún hefði átt í sambandi við Trump. Í kjölfarið bárust ásakanir um að greiðslan til Clifford hefði verið ólögleg og dregin af kosningafé.
Cohen segir greiðsluna hins vegar hafa verið löglega og ekki tekna af framboðsfénu. Spurður hvers vegna hann hafi borgað Clifford sagði Cohen við CNN: „Jafnvel þó að eitthvað sé ekki satt þá þýðir það ekki að það geti ekki valdið skaða og ég mun alltaf verja Trump.“
„Hefur smám saman verið að lagast“
„Ennþá í hálfgerðu áfalli yfir þessari frétt“
„Sárt að horfa upp á þetta“
Stórbruni í Kaupmannahöfn: Børsen í ljósum logum
„Eins og ef Alþingishúsið brynni hér“
Íslenska ríkið dæmt brotlegt
„Ef það er einhver einn lærdómur...“
Danir í áfalli yfir brunanum