Belgíska knattspyrnusambandið hefur hætt við að nota lag rapparans Damso sem einkennislag sambandsins á HM í sumar eftir að Damso var sakaður um níð í garð kvenna í textum sínum.
Valið á Damso vakti töluverða úlfúð í Belgíu en í textum sínum fjallar hann meðal annars um kynferðislegt ofbeldi í garð kvenna og að sögn aðgerðarsinna og styrktaraðila þá eru þeir oft fullir af kvenhatri.
Knattspyrnusambandið, RBFA, hefur nú beðið þá afsökunar sem töldu að sér vegið með valinu á Damso og að náðst hafi samkomulag við tónlistarmanninn um að hætta við lagið.
Lag Damso, sem er Belgi ættaður frá Kongó, Humains átti að verða einkennislag Belga á HM í Rússlandi. En kvenréttindaráð Belgíu er meðal þeirra fjölmörgu sem gagnrýndu valið. Segir í bréfi sem það sendi til RBFA að í textanum sé hann að lýsa viðbjóðslegri áreitni og ofbeldi í garð kvenna á því stigi að það sé til háborinnar skammar fyrir sambandið.
L'URBSFA confirme le choix de @THEDAMSO.
— Belgian Football (@Belgianfootball) March 7, 2018
ℹ https://t.co/Uj7wnjXop9