Stjórnvöld í Moskvu segja þá ákvörðun breskra stjórnvalda að vísa 23 rússneskum erindrekum úr landi vera til merkis um að Bretar velji ágreiningsleiðina og að Rússar muni svara fyrir sig á næstunni.
„Bresk stjórnvöld hafa ákveðið árekstur við Rússland,“ sagði í yfirlýsingu frá rússneska utanríkisráðuneytinu. „Við verðum ekki lengi að svara fyrir okkur.“
Theresa May, forsætisráðherra Bretlands, sagði er hún tilkynnti ákvörðun breskra stjórnvalda fyrr í dag að hópurinn hefði viku til að yfirgefa landið. Er hann sagður samanstanda af leyniþjónustumönnum sem ekki hafi heimild til slíkra starfa í Bretlandi. „Þetta er stærsta brottvísun í yfir þrjátíu ár og þetta endurspeglar þá staðreynd að þetta er ekki í fyrsta sinn sem rússneska ríkið fer í aðgerðir gegn landi okkar,“ sagði May. Þá sagði hún bresk stjórnvöld ætla að auka eftirlit með Rússum sem koma til Bretlands.