Látin laus 15 ára fangelsi vegna fóstureyðingar

Fóstureyðingar eru bannaðar með lögum í El Salvador og skipta kringumstæður engu. Maira Verónica Figueroa Marroquín er 34 ára gömul. Í gær var hún látin laus úr fangelsi eftir að hafa setið inni í 15 ár fyrir að hafa farið í fóstureyðingu. 

Figueroa var dæmd í 30 ára fangelsi fyrir morð árið 2003 en hún hefur alltaf haldið fram sakleysi sínu. Að sögn Figueroa fæddi hún andvana barn á heimilinu sem hún starfaði sem þjónustustúlka árið 2003. Farið var með hana á sjúkrahús, hún handtekin og síðan dæmd fyrir að hafa farið í fóstureyðingu. 

Foreldrar hennar, blaðamenn og aðgerðarsinnar biðu fyrir utan fangelsið í Ilopango, skammt fyrir utan höfuðborgina, San Salvador, þegar hún var látin laus í gær og fögnuðu með henni en hæstiréttur stytti dóminn yfir henni nýverið. Hún er önnur konan sem hæstiréttur styttir dóm yfir vegna fóstureyðingar á þessu ári í El Salvador.

Frétt af mbl.is

„Hún er frjáls“

BBC hefur eftir henni að hún ætli sér að hefja nýtt líf og vinna upp það sem hún missti af. 

El Salvador er eitt fárra landa í heiminum þar sem fóstureyðingar eru ólöglegar sama hverjar kringumstæðurnar eru og liggja þungar refsingar við brotinu. Ef kona verður uppvís af því að hafa farið í fóstureyðingu á hún yfir höfði sér 8 ára fangelsi og hægt er að þyngja refsinguna upp í 30 ára fangelsi. 

Læknar sem telja að konur hafi reynt að binda endi á þungun er gert að tilkynna það til yfirvalda. Að öðrum kosti eiga þeir yfir höfði sér langa fangelsisdóma. 

Mannúðarsamtök hafa bent á að þetta geri það að verkum að fósturlát eru talin saknæm og oft koma upp neyðartilvik þar sem fóstureyðingar eru framkvæmdar við skelfilegar aðstæður. 

• Blogga um frétt