Taka rafmagnið af til að minnka yfirvinnu

Stjórnvöld í Suður-Kóreu hyggjast taka strauminn af tölvum ríkisstarfsmanna sinna  svo þeir hætti að vinna jafn mikla yfirvinnu og raun ber vitni og fari heim til sín. Markmiðið er að reyna að uppræta „menningu yfirvinnu“ sem er ríkjandi í landinu. BBC greinir frá. 

Íbúar í Suður-Kóreu vinna einna þjóða lengst mest. Ríkisstarfsmenn vinna að meðaltali 2.739 vinnustundir á ári sem er um 1.000 klukkustundum betur en ríkisstarfsmenn í öðrum þróuðum ríkjum heims. 

Starfsmennirnir fá tíma til að aðlagast því þetta verður gert í skrefum. Fyrst verður straumurinn tekinn af klukkan átta á föstudagskvöldum frá og með 30. mars.  Í  maí verður ekki hægt að vinna í tölvunum eftir klukkan 19 alla föstudaga.   

Þetta mun gilda um alla ríkisstarfsmenn. Hins vegar verður hægt að óska eftir undanþágu í einstaka tilvikum. Þetta leggst ekki vel í alla ríkisstarfsmenn en nú þegar hafa 67,1% þeirra óskað eftir að vera undanþegnir því að rafmagnið verði tekið af starfsstöð þeirra.  

Fyrr í þessum mánuði samþykkti þingið lög þess efnis að vinnustundum á viku yrði fækkað úr 68 klukkustundum niður í 52.  

• Blogga um frétt