Rússar kröfðust þess í dag að boðað yrði til fundar í öryggisráði Sameinuðu þjóðanna vegna máls rússneska gagnnjósnarans Sergei Skripal, en eitrað var fyrir honum og dóttur hans Yuliu með taugeitri í breska bænum Salisbury í byrjun mars. AFP-fréttastofan greinir frá.
Fulltrúi Rússa í öryggisráðinu, Vassily Nebenzia, hefur óskað eftir fundi í ráðinu á morgun, fimmtudag, vegna ásakana Breta um að Rússar beri ábyrgð á tilræðinu, en notast var við svokallað novichok-eitur sem þróað var og framleitt í Rússlandi. Enn hefur þó ekki tekist að bera kennsl á nákvæman uppruna eitursins.
Stjórnvöld í Rússlandi hafa harðneitað því að bera nokkra ábyrgð á tilræðinu. Sergei Lavrov, utanríkisráðherra Rússlands, hefur sagt að mögulegt sé að bresk stjórnvöld hafi sjálf fyrirskipað eiturárásina á njósnarann fyrrverandi Sergei Skripal til að beina athyglinni frá vandamálum landsins vegna útgöngu úr Evrópusambandinu.