Sluppu með skrekkinn undan skýstróki

Skýstrókurinn kom æðandi í átt að þeim þar sem þau …
Skýstrókurinn kom æðandi í átt að þeim þar sem þau óku eftir veginum. Skjáskot/Facebook

Par frá Arkansas í Bandaríkjunum segir að bílbeltin hafi bjargað lífi þess eftir að hafa verið mjög nærri skýstróki fyrir helgi. Atvikið náðist á myndband.

Savannah Boerjan og Brandon eiginmaður hennar voru að aka heim á leið á föstudag á húsbíl sem þau höfðu verið að kaupa. Þá birtist allt í einu skýstrókur fyrir framan þau. „Keyrðu hraðar, drífum okkur héðan,“ má heyra Savannah hrópa á myndbandinu. „Brandon, Brandon, ég er hrædd.“

Parið hélt áfram að aka eftir veginum en skýstrókurinn stækkaði í sífellu og færðist nær.

„Hann er hérna. Ó, guð minn góður. Góði guð, fyrirgefðu syndir okkar. Brandon, við erum að deyja. Ég elska þig, ég elska þig,“ hrópar Savannah rétt áður en skýstrókurinn strýkst við bíl þeirra og framrúðan brotnar svo brak feykist inn í bílinn. Bíllinn þeyttist svo út af veginum og hafnaði á hvolfi.

Parið hlaut þó aðeins minni háttar meiðsli. 

Savannah birti myndir á Facebook-síðu sinni og sagði að þau væru óhult. „Öryggisbeltin björguðu lífi okkar. Við værum ekki hér ef við hefðum ekki notað þau.“

mbl.is
Fleira áhugavert
Fleira áhugavert