Stormy Daniels, klámmyndaleikkonan sem segist hafa sofið hjá Donald Trump, forseta Bandaríkjanna, árið 2006, lék sjálfa sig í grínatriði sem birtist í bandaríska sjónvarpsþættinum Saturday Night Live. Í atriðinu hæðist hún að forsetanum og kallar eftir afsögn hans. „Ég veit að þú trúir ekki á loftslagsbreytingar, en það er von á stormi vinur,“ segir hún meðal annars.
Daniels fékk greidda 130 þúsund Bandaríkjadali rétt fyrir forsetakosningarnar árið 2016 til þess að koma í veg fyrir að hún tjáði sig um meint samband hennar við forsetann. Daniels hefur greint frá því að þau hafi sofið saman einu sinni en að Trump hafi margítrekað reynt að endurnýja kynni. Það var lögmaður Trump, Michael Cohen, sem lét Daniels hafa peningana, en forsetinn mun hafa endurgreitt honum. Hún höfðaði mál gegn lögmanninum til þess að fá samkomulagi um þögn hennar um samband við forsetann hnekkt, en 90 daga hlé var gert á málsmeðferðinni við ríkisdómsól Kaliforníu í lok apríl.
Trump hefur neitað því að hafa átt í kynferðislegu við Daniels, en segir hana hafa fengið greitt svo hún hætti að koma með falskar ásakanir.
Í grínatriðinu þá hringir Alec Baldwin, sem Trump, í Daniels í þeim tilgangi að útkljá málið í eitt skipti fyrir öll. Segir hann meðal annars að allir viti að þessar ásaknir séu bara leikrænir tilburðir. „Ég leik í klámmyndum, við sem gerum það erum ekki þekkt fyrir leiklistarhæfileika okkar,“ svaraði hún.
Baldwin, sem Trump, spurði hana þá hvað hann þyrfti að gera til að hún hætti þessu. „Segja af mér?“ spurði hann. „Ég leysti vandamálið með Norður og Suður Kóreum af hverju get ég ekki leyst þetta á milli okkar?“ spurði hann jafnframt.
„Þú verður að fyrirgefa Donald, það er of seint. Ég veit að þú trúir ekki á loftslagsbreytingar, en það er von á á stormi vinur.“