Vladimir Pútín sór embættiseið sem forseti Rússlands í athöfn í Kreml í dag. Þetta er fjórða kjörtímabil forsetans og þar með framlengist næstum tveggja áratuga valdatíð hans um sex ár í viðbót.
„Ég lít á það sem skyldu mína og markmið í lífi mínu að gera allt sem hægt er fyrir Rússland, bæði í dag og í framtíðinni,“ sagði Pútín, með hönd sína á rússnesku stjórnarskránni.
Pútín, sem hefur verið við völd í Rússlandi frá árinu 1999, var endurkjörinn í kosningum í mars síðastliðnum með 76,7 prósentum atkvæða.
„Ég er vel meðvitaður um gríðarlega ábyrgð mína,“ bætti hann við og þakkaði í framhaldinu Rússum fyrir „einlægan stuðning“ og „samstöðu“.
„Við höfum endurvakið stolt okkar á föðurlandinu,“ sagði forsetinn.
WATCH: Russian President Vladimir Putin delivers inauguration speech in the Grand Kremlin Palace's ornately-decorated Andreyevsky Hall.https://t.co/pZj7ga11s6 pic.twitter.com/tynlOBO3aY
— euronews (@euronews) May 7, 2018