Donald Trump, forseti Bandaríkjanna, mun samkvæmt heimildum hafa tjáð Emmanuel Macron, forseta Frakklands, að hann hyggst tilkynna í dag að Bandaríkin muni ekki styðja kjarnorkusamkomulagið við Íran áfram. Þetta segir í umfjöllun New York Times.
Samkvæmt heimild New York Times á Trump að hafa sagt Macron frá áformum sínum í morgun í samtali þeirra á milli. Samkvæmt áætlun mun Trump formlega tilkynna afstöðu sína í dag klukkan 18 íslenskum tíma.
Segi Bandaríkin sig frá samkomulaginu frá 2015 mun það þýða að þvingunaraðgerðir Bandaríkjanna gegn Íran munu verða settar að nýju, heimildarmaðurinn segir slíkar aðgerðir þegar í undirbúningi. Jafnframt hyggjast stjórnvöld í Bandaríkjunum beita nýjum efnahagslegum þvingunum.
Annar heimildarmaður hefur upplýst að viðræður um kjarnorkusamkomulagið hafi strandað vegna kröfu Trumps um að takmarkanir á framleiðslu Írans á kjarnorkueldsneyti verði í gildi lengur en til 2030, en gildandi samkomulag gerir ráð fyrir að draga úr takmörkunum eftir þann tíma.
Talið er að óvissa geti skapast í samskiptum Bandaríkjanna og bandamanna þeirra í Evrópu vegna málsins. Á sama tíma geta samskipti Bandaríkjanna við Kína og Rússland hlotið skaða þar sem þessi ríki einnig eru aðilar að samkomulaginu.
Hassan Rouhani, forseti Íran, segir að ef Bandaríkin segi sig frá kjarnorkusamkomulaginu við Íran, sem var undirritað árið 2015, muni þeir „sjá mikið eftir því.“