Japan lækkar sjálfræðisaldur

Ný lög voru í gær samþykkt af japönsku ríkisstjórninni sem segja til um að sjálfræðisaldur íbúa muni lækka úr tuttugu árum í átján frá og með apríl 2022. Áfengisaldur landsins verður þó áfram tuttugu ár líkt og hér á landi.

Samkvæmt vef CNN er um að ræða fyrstu lagabreytinguna af þessu tagi í 142 ár. Átján ára einstaklingar geta þá eignast kreditkort, sótt um lán og gift sig án samþykkis foreldra. Í dag geta átján ára karlmenn og sextán ára kvenmenn gift sig með leyfi foreldra. Kosningaaldurinn í Japan hefur verið átján ár frá árinu 2015 þegar hann var lækkaður úr tuttugu árum.

• Blogga um frétt