Evrópuþingið hafnaði í dag umdeildu frumvarpi um breytingar á höfundarréttarlöggjöf í núverandi mynd og ákvað að fresta málinu fram í september.
Lögin hefðu sett ríkari kröfur á vefsíður um að sporna við því að höfundarréttarvarið efni væri að finna á síðum þeirra, jafnvel þótt um væri að ræða miðla þar sem hver sem er getur hlaðið upp efni.
Þungavigtarmenn í netheimum, svo sem Tim Berners-Lee, faðir internetsins, og Jimmy Wales, stofnandi frjálsu alfræðiorðabókarinnar Wikipedia, höfðu lýst yfir áhyggjum sínum af lagasetningunni og sagt hana ógna frelsi internetsins. Vefsíðum Wikipedia í þremur Evrópulöndum, Spáni, Ítalíu og Póllandi, lá niðri í gær í mótmælaskyni til að vekja athygli á frumvarpinu.
Andstæðingar lagasetningarinnar hafa fagnað ákvörðuninni. Julia Reda, Evrópuþingmaður Pírata frá Þýskalandi, sem barðist gegn lagasetningunni þakkaði mótmælendum vel unnin störf í færslu á Twitter, en minnti á að verkinu sé ekki lokið. Frumvarpið fer nú í frekari vinnu innan þingsins en kosið verður um það endanlega í september.
278 Evrópuþingmenn kusu með tillögunni en 318 gegn henni. Margir þingflokkar voru klofnir í málinu, þar á meðal EPP, bandalag hægri manna, og S&D, bandalag jafnaðarmanna, tveir stærstu flokkarnir á þinginu. Bróðurpartur EPP-liða kaus með tilögunni en jafnaðarmenn voru svo að segja klofnir í tvennt.
Þingmenn Pírata lögðust gegn tillögunni, sem og nær allir græningjar og meirihluti þingmanna ALDE, bandalags frjálslyndra, og Norrænna vinstri grænna GUE-NGL, en sá flokkur er ólíkur græningjum að því leyti að þeir vilja endurskipuleggja Evrópusambandið og hverfa frá því sem þeir kalla „nýfrjálshyggjupeningastefnu“ sambandsins.
Frumvarpið er umfangsmikið. Það byggir á stefnu ESB um stafrænan innri markað sambandsins var samþykkt í lögfræðinefnd Evrópuþingsins en þar er meðal annars er stefnt að því að „minnka mismun á höfundarréttarlöggjöf milli aðildarríkja“. Auk þess eru í frumvarpinu umbætur í átt að því að leyfa notkun höfundarréttarvarins efnis þvert á landamæri ESB-ríkja og fleira sem litlar deilur eru um innan þingsins.
Það eru einkum tvær greinar frumvarpsins sem valda deilum, númer ellefu og þrettán. Elleftu grein frumvarpsins var ætlað að útvíkka lagarammann sem verndar hugverk fyrir fréttamiðlum. Ef af lagasetningunni hefði orðið hefði þurft leyfi fyrir notkun smámyndar eða textabúts með fyrirsögn. Lagasetningunni var beint að Google og Facebook, sem fá til sín mikla netumferð með hlekkjum á fréttir annarra án endurgjalds, en hefði haft áhrif á mun fleiri: samfélagsmiðla á borð við Reddit, bloggara, fréttaveitur o.fl.
Gagnrýnendur þessarar tillögu, svo sem Evrópuþingmenn Pírata, uppnefndu hana Hlekkjaskattinn, Link Tax.
Þrettánda grein frumvarpsins setur auknar skyldur á herðar vefsíðna sem búa yfir „miklu magni“ efnis sem hlaðið er upp af notendum. Skulu þær nota tæknina til þess að koma í veg fyrir höfundarréttarbrot. Þessi grein hefði einkum áhrif á samfélagsmiðla, en miðað við umfang þess efnis sem hlaðið er á miðlana er ljóst að slíkri lagasetningu yrði aldrei framfylgt nema með sjálfvirkum síum sem myndu leita uppi höfundarréttarvarið efni, nokkurs konar vélmennavöktun.
Tillagan er þó ekki munaðarlaus. Hún nýtur meðal annars stuðnings Bítilsins Paul McCartney. Í bréfi sem hann skrifaði Evrópuþingmönnum segir
„Í dag eru margar síður sem leyfa notendum að hlaða upp efni en neita að borga listamönnum og tónskáldum sanngjarnt gjald fyrir vinnu þeirra, sem þeir misnota sjálfum sér til gróða,“ segir í bréfinu.
„Höfundarréttarfrumvarpið og þrettánda greinin myndi taka á þessu og tryggja sjálfært umhverfi tónlistar fyrir tónlistarmenn, aðdáendur og streymisveitur.“
Þá birti Axel Voss, þingmaður hægribandalagsins EPP, og flutningmaður tillögunnar myndband á heimasíðu Evrópuþingsins þar sem hann færir rök fyrir lagasetningunni og hrekur það sem hann kallar „falsfréttir“ um málið.