Frægasta ströndin lokuð næstu árin

Taílenska flóanum sem varð frægur vegna kvikmyndarinnar The Beach verður lokað um óákveðinn tíma svo lífríkið fái að jafna sig eftir hjarðir ferðamanna sem þangað hafa komið í kjölfar myndarinnar. Þegar var í gildi tímabundið bann við heimsóknum á svæðið. 

Maya-flói sem er undir klettabelti á eyjunni Ko Phi Phi Ley var á allra vitorði eftir kvikmyndina The Beach með Leonardo DiCaprio í aðalhlutverki en myndin kom út árið 2000.

Í júní var ákveðið að banna komur fólks á svæðið vegna landrofs og mengunar í þessari paradís sem áður hafði mjallhvítar sandstrendur. 

Í ljós kom að hin tímabundna lokun var ekki nóg svo að svæðið gæti jafnað sig. Þá kom í ljós að landskemmdir voru meiri en áður hafði verið talið.

Leonardo DiCaprio í hlutverki sínu í kvikmyndinni The Beach.

Yfirmaður þjóðgarða og verndarsvæða í Taílandi segir að lífríkið hafi skemmst alvarlega vegna daglegrar komu um 5.000 ferðamanna. Frá því í júní hafi svæðið verið skoðað reglulega og nú sé ljóst að það þarf lengri tíma til að jafna sig.

Skemmdir hafa orðið á gróðri og mengun orðið á landi sem og í flóanum vegna mikillar bátaumferðar. Óttast er að kóralrif hafi skemmst en þau eru þegar viðkvæm vegna loftslagsbreytinga.

Talið er að flóinn verði lokaður ferðamönnum í að minnsta kosti fjögur ár. 

Hefur slæm áhrif á nærsamfélagið

Á hverju ári heimsækja 35 milljónir ferðamanna Taíland. Margir leggja leið sína til bæjarins Krabi og fara þaðan á báti að Maya-flóa. 

Fyrirtæki í ferðaþjónustu eru vonsvikin með þessi málalok. „Allir ferðamenn vilja sjá Maya-flóa,“ segir Nanthapat Horbut sem rekur ferðaþjónustu sem flutt hefur fólk að hinni frægu strönd. 

Þá hafa margir miklar áhyggjur af áhrifunum sem verða á nærsamfélagið sem stólar á ferðaþjónustuna til tekjuöflunar. Er mælst til þess að ríkið reyni með einhverjum hætti að koma til móts við íbúana. 

• Blogga um frétt