Hnýta í Kanadamenn vegna kannabisefna

Rússar segja að sú ákvörðun Kanadamanna að leyfa sölu og notkun kannabisefna í ríkinu sé „óásættanleg“ og á svig við alþjóðalög. Þetta kemur fram í yfirlýsingu sem rússneska sendiráðið í Ottawa, höfuðborg Kanada, sendi frá sér í dag.

Í yfirlýsingunni segir að ákvörðun Kanadamanna um að heimila notkun kannabisefna, sem tók gildi 17. október sl. muni verða til þess að önnur ríki „muni líklega þurfa að grípa til ráðstafana til að koma í veg fyrir mögulegar tilraunir til kannabis-smygls frá Kanada“.

Frétt af mbl.is

Neysla kannabis refsilaus í Kanada

Samkvæmt yfirlýsingu Rússa telja þeir Kanadamenn vera að brjóta gegn alþjóðasáttmálum sem ætlað er að koma í veg fyrir alþjóðlega útbreiðslu fíkniefna.

Richard Walker, talsmaður utanríkisráðuneytis Kanada, vísar ávirðingum Rússa á bug. Hann segir við AFP-fréttaveituna að Kanada sé enn „dyggur stuðningsmaður“ hins alþjóðlega regluverks sem ætlað er að sporna gegn fíkniefnaviðskiptum yfir landamæri og að Kanada muni halda áfram að „berjast gegn fíkniefnasmygli“.

• Blogga um frétt