Segir Ku Klux Klan í Hvíta húsinu

Nicolas Maduro, forseti Venesúela, segir Ku Klux Klan stjórna í …
Nicolas Maduro, forseti Venesúela, segir Ku Klux Klan stjórna í Hvíta húsinu. AFP

Nicolas Maduro, forseti Venesúela, sakaði í viðtali við BBC ríkisstjórn Bandaríkjanna og Donald Trump um að vera „öfgahóp“ og um að hafa orsakað ástandið í landinu. „Þeir eru með stríðsáróður í þeim tilgangi að taka yfir landið okkar,“ sagði Maduro.

Bandaríkin hafa ásamt öðrum vestrænum ríkjum viðurkennt Juan Guaido sem tímabundinn forseta Venesúela.

Maduro sagði átökin við Bandaríkin vera „pólitískt stríð af hálfu bandaríska heimsveldisins í þágu öfga hægriafla sem ráða ríkjum, Ku Klux Klan, sem stjórnar í Hvíta húsinu og ætlar sér að taka yfir Venesúela.“

„Almenningsálitið um allan heim mun sigra þennan öfgahóp í Hvíta húsinu,“ var haft eftir forsetanum.

Forsetinn er sagður undir miklum þrýstingi bæði innanlands, sem og erlendis frá, til þess að halda nýjar forsetakosningar í landinu. Þá ríkir versnandi efnahagsástand og hafa venesúelsk stjórnvöld verið sökuð um víðtæka spillingu og mannréttindabrot.

mbl.is
Fleira áhugavert
Fleira áhugavert