Mikill eldur logar nú í Notre Dame-kirkjunni í París og leggur eldtungur og þykk reykský yfir Parísarborg og er stærsti turn kirkjunnar nú hruninn. CBS-sjónvarpsstöðin sendir beint út frá eldinum og er hægt að fylgjast með brunanum þar.
BBC hefur eftir talsmanni kirkjunnar að öll byggingin sé að brenna. „Það verður ekkert eftir,“ sagði hann.
Slökkviliðsbílar hafa sést þjóta í gegnum borgina í átt að Ile de la Cite þar sem Notre Dame stendur. Þá hefur lögreglan í París hvatt íbúa borgarinnar á Twitter til að forðast svæðið til að auðvelda megi aðgengi slökkviliðs og hjálparsveita og búið er að rýma svæðið næst kirkjunni.