Norðurkóreski herinn skaut „fjölda óþekktra eldflauga“ á loft frá austurströnd landsins í kvöld, samkvæmt stjórnvöldum í Suður-Kóreu.
„Við getum ekki sagt til um það hve langt þær flugu og erum að greina málin og sömuleiðis að búa okkur undir fleiri eldflaugaskot,“ sagði suðurkóreskur embættismaður við AFP-fréttastofuna í kvöld.
Yfirvöld í Norður-Kóreu hafa ekki sent frá sér neina yfirlýsingu vegna eldflaugaskotanna, sem eiga sér stað einungis sex dögum eftir að Kim Jong-un leiðtogi ríkisins fylgdist sjálfur persónulega með tveimur eldflaugaskotum.
Stutt er síðan hann átti eftirminnilegan en snarpan fund með Donald Trump Bandaríkjaforseta á landamærum Kóreuskagans, en endurteknar vopnatilraunir og hernaðaruppbygging Norður-Kóreumanna er einmitt það sem Bandaríkin vilja að ríkið láti staðar numið með.
Harry Kazianis, sem starfar hjá hugveitunni Center for the National Interest í Washington í Bandaríkjunum, segir við AFP að hann telji að eldflaugaskot Norður-Kóreu í kvöld hafi verið viðvörun til Bandaríkjamanna og Suður-Kóreumanna, vegna fyrirhugaðra heræfinga ríkjanna tveggja við strendur Suður-Kóreu í ágúst.
Hann býst við því að Norður-Kóreumenn haldi áfram að skjóta flaugum á loft, í því skyni að reyna að koma í veg fyrir heræfinguna, en ríkið lýsti því yfir eftir eldflaugatilraunirnar á fimmtudag að um væri að ræða „alvarlega viðvörun“ til nágrannanna í suðri vegna fyrirhugaðra æfinga sameiginlegs herafla við Kóreuskagann.